Янгиликлар

  • Анвар Ғофуров: «Ҳали кўп рақибларга муаммо бўламиз»

  • Сана: 20.07.2019
  • «Бунёдкор»нинг Минскдаги ўқув-йиғин машғулотлари якунланиб бормоқда. Жамоанинг тажрибали ўйинчиси Анвар Ғофуровнинг йиғин ҳақидаги фикрлари билан қизиқдик.

    - Жамоада ҳаммаси жойида. Футболчилар бир-бири билан аҳил, барча бир бўлиб ўйинимизни янада яхшилаш, натижа кўрсатиш учун меҳнат қиляпти. Мураббийлар штаби томонидан берилаётган вазифалар, юкламалар, кўрсатмаларни бажариш биз футболчиларга завқ бағишлаяпти, десам тўғри бўлади. Буни ўйинчиларнинг юз-кўзидан, ҳаракатларидан билиш мумкин. Минскнинг иқлимига гап бўлиши мумкин эмас!

    Иккинчи даврага тайёргарликни юртимизда ҳам ўтказишимиз мумкин эди, лекин иссиқ иқлимда юклама олиш билан ҳозиргидек салқинда жисмоний кучга ишлашнинг орасида фарқ бўлади. Иссиқдаги юкламалар зиёнимизга ҳам ишлаши мумкин. Ўйлайманки, мазкур йиғиндаги юкламалар иккинчи даврада бизга фойда беради.

    Агар ҳозирги ҳолатимизда иккинчи даврага кириб борсак, ўйлайманки, кўплаб рақибларимизга муаммо бўла оламиз ва асабига тегамиз. Минск йиғини давомида ҳозиргача учта ўртоқлик учрашуви ўтказдик. Айтиш керак, уччала рақиб ҳам каминада ижобий таассурот қолдирди. Тўғри, барча ўйинларда ғалаба қозонганимиз рақибларни кучсиз кўрсатар, аммо мен ундай демаган бўлардим. Сабаби, бу баҳсларда биз ўз ўйинимизни топа олдик. Шу боис тўп назорати бўйича рақибдан устунлик қилдик. Назаримда Белорусь клублари пасларга асосланган футбол ўйнамайди, балки шунинг учун улар бизнинг ўйинга мослаша олмади.

Мавзуга оид бошқа хабарлар